رواية طلاق بسبب الخيانة الفصل الاول قصة رائعة من الواقع

خالد: أنتِ هتتطلقي طالما بنحب بعض، وأنا هطلق مراتي ونتجوز أنا وانتِ بعد أيام عدتك أما تعدي أكون في الوقت دا جددت الشقة

هى: بس هتروح تتطلق مراتك كدا بدون سبب ولا هترمي عليها الطلاق وتقولها عشان حبيت واحدة ورايح أتجوزها

خالد: لأ مش عارف بس هعمل سبب قوي عشان تتطلق، احنا أصلا عايشين مع بعض زي أي اتنين اتجوزوا عشان أهلنا شافونا مناسبين لبعض واللي هو مش شرط الحب، لا هى بتحبني ولا أنا بحبها يبقى كل واحد يروح لحاله

هى بحزن في داخلها خسيس يا خالد، فردت عليه وقالت: يعني مش بتضحك عليا؟ وبتحبني بجد

خالد بسرعة بعت لها فويس وهو بيحلفلها إنه بيحبه
فقالت بوجع: خلال خلال تلات أيام هطلق من جوزي وأنت تتطلق مراتك ونجتمع أنا وأنت

خالد: موافق يا حبيبتي

فقالتله: طب سلام عشان رايحة أنام

خالد: ماشي تصبحي على حاجة جميلة شبهك

بعتتله ايموچي قلب، وقفلت وهى دموعها على خدها، حطت الموبايل تحت المخدة بسرعة، وسمعت خالد رايح أوضة الأطفال ينام فيها فاتنهدت وقالت: يا خسارة وقتي اللي ضيعته معاك في الفاضي، ونامت عشان تهرب من الواقع المؤلم

فات تلات أيام وخالد بيفكر في مشكلة يعملها عشان يطلق نهى بدون ما يكون عليه الغل

كانت نهى في المطبخ كعادتها بتجهز الغدا، جه من الشغل وهينفذ اللي خططله

فحط مفاتيحه ودخل المطبخ وهو متعصب وقال: إيه ريحة الطبيخ اللي في الشقة دي هتخنقني، أنا جاي من الشغل تعبان عايز مكان نضيف وهادي

أجي ألاقي البيت بالمنظر دا، إيه الإهمال دا؟ مش صالحة تكوني زوجة عارفة إيه اللي بيحبه جوزها وإيه اللي بيضايقه ومش تعمله، وكمان منظرك دا مفيش اهتمام بشكلك خالص

بصتله نهى بصدمة لكن بعدها فهمت إنه عايز يعمل مشكلة عشان يلاقي سبب يطلقها فمشيت معه عالخط وعملت نفسها مش عارفة حاجة

ياترى لما يعرف إنها مراته هيعمل إيه؟