مساعدة لدجاله
انت في الصفحة 1 من 7 صفحات
أنا بشتغل مساعدة لواحدة بتعمل أعمال وس0حر أسود للناس
انا سارة 25 سنة وحيدة أهلي.. والدي ووالدتي اتوفوا مع بعض في حادث من سنة..
ومن ساعتها في قواضي مرفوعه عشان اخد ورثي.. محدش من عيلتي بيساعدني لان اهلي ماكانوش على تواصل معاهم اطلاقا ولا كنا نعرف عنهم حاجه
ما بقتش عارفه اروح فين ولا اجي منين ؟! لحد ما كلمت خالي الوحيد..و رد عليا وقالي تعاليلي ووصفلي عنوانه.. جبت رقمه من ورق قديم بتاع ماما.. روحتله بشنطتي عشان يلحقني وننقل بيقة الحاجه اللي في شقتنا
لما دورت على صاحب العماره قالي انتي مشيتي ومش معايه رقمك ومش هوقف الدنيا عشان شويه عفش قديم اتخانقت معاه والشارع كله اتلم بس ماعرفتش اخد منه لاحق ولا باطل طبعا
حسيت اني لوحدي في الدنيا دي احساس صعب على اي راجل ما بالك بنت.. كلمت صحباتي البنات عشان مابقتش قادره اعيش مع خالي اللي بيتعامل معايه بقرف هوا ومراته.. بس هنا اتسالت سؤال كسرني مش عارفه اجابته.. صحبتي قالتلي طيب هتقعدي معانا قد ايه ؟
قولتلها مش عارفه ؟ قالتلي طيب هسال ماما واكلمك قولتلها ماشي قولت خلاص اقولها اسبوعين بس لحد ما اكون لقيت شغل.. فضلت مستنية ساعه اتنين تلاته ماقدرتش وكسرة نفسي بتقولي ما تكلمهاش
خدت بايدها وعديتها قالتلي مالك يا حبيبتي ؟ قولتلها مافيش.. قالتلي عايزة مساعده قولتلها لا.. قالتلي طيب في مكان تنامي فيه ؟ استغربت سؤالها بس قولتلها لا.. قالتلي طب تعالي معايه طريقنا واحد
مشيت معاها وطلعت ساكنه في حته شعبية.. وصلنا قدام باب بيتها وفتحت وقالتلي تعالي انا ساكنه لوحدي دخلت معاها وانا مش فارق معايه اي حاجه تحصل.. قالتلي اوضتك اهي كانت اوضه بنتي قبل ما تتجوز
وعملتلي اكل وبصراحه ما قصرتش معايه.. وبعدها قالتلي احكيلي حكايتك فحكيتلها.. قالتلي ماشي انا هشوفلك شغلانه كويسه تاكلي منها الشهد.. قالتلي استني هنا وطلعت من شقتها ورجعت بعد نص ساعه قالتلي تعالي
قولتلها هنروح فين بليل كده ؟ قالتلي ماتخافيش مش هنطلع برة العماره وفعلا هي كانت ساكنه في الدور الاول فطلعنا الدور التالت.. ومطلعه مفتاح وفتحت الشقه وسحبتني من ايدي.
